Agostu Mean iha Timor nia 1975: Rekupera Esperansa no Reinventa Politika Emansipatoriu
“When we revolt it’s not for a particular culture. We revolt simply because, for many reasons, we can no longer breathe”
― Frantz Fanon
“an Event is necessarily missed the first time, that true fidelity is only possibly in the form of resurrection, as a defence against “revisionism”
― Slavoj Zizek
“Let us hail it, see it and relate it to the whole world. For at the moment the world is cruelly lacking this genie”
― Alain Badiou
Tinan 24 luta ba libertasaun bele situa kompletamente iha forma diferente husi eventu politika-sira iha fulan Agostu: dahuluk, Revolusaun Popular iha 1975, no daruak mak Konsultasaun Popular(tuir versaun nasionalista, referendum) iha 1999. Daruak ne’e, simu nudar loron matan foun sae iha rai exploitadu Maubere — tan ne’e, nia selebra nudar manan, hodi hakotu-an sai husi estadu totalitarian Indonezia, no sai pasporte ba iha rai-ketan prometidu husi independensia no demokrasia.
Iha artigu ne’e sei reintepreta hikas ba insureisaun armada iha 15 Agostu 1975 ne’ebe tuir kedas ho funu-sivil, no oinsa ruptura ne’e loke posibilidade ba politika revolusionariu no emansipatoriu. Hau seguru tebes hodi konsidera,15 Agostu 1975, tempu ne’ebe determinante tebes ba historia luta libertasaun, formasaun nasaun, estadu no povo.
Agostu Mean 1975
Agostu Mean 1975 nudar eventu politika emansipatoriu — eventu ne’e haluha explizita, ignora parsial tebes husi Fretilin sira iha Timor hafoin ukun-an — husi historia ne’e, nudar razaun ba ataka husi reaksionariu too ba eis kolonial Portuges hasoru FRETILIN to’o agora. Tan ne’e, ataka hasoru historia revolusionariu funu sivil ne’e, automatiku ataka hasoru historia eskerda iha FRETILIN.
Duke ne’e, ba ita, Agostu Mean 1975 nudar istoria ba asaun revolusionariu ‘horik-ba’, iha ne’ebe, asaun-sira nee rasik fo interupsaun ba lalaok normal, no posibilidade foun mosu iha mundu.
Iha ne’e, 11 Agostu 1975, UDT, soran no dudu husi liman-ain imperialista hanesan estadu Indonezia, estadu kapitalista Osidental sira hanesan Australia ho Amerika, no fasilita husi polisia estadu kolonial Portuges, lansa violensia kontra-revolusionariu ho objetivu hodi harahun Fretilin, liuliu ba faksaun karuk no komunista iha Fretilin laran.
Inisiu golpe, forsa UDT kontrola infraestrutura estratejiku sira no postu administrativu xave sira hanesan Dili, Baucau inklui fatin seluk. Loron hirak deit, UDT sunu uma, oho, tortura, kastigu no hadadur ema barak, liuliu hirak ne’ebe hatene nudar militante ba Fretilin. Fretilin nia lider-sira hakiduk ba foho ninin iha Dili, 15 minutu molok UDT lansa golpe, no hakiduk liu tan ba konsentra iha Aileu.
Hafoin kontrola no lansa violensia fatin-fatni, UDT nia forsa polisial, iha planu hodi avansu ba ataka Fretilin iha loron 15 Agostu 1975. FRETILIN nafatin responde ho jestu negosiasaun no rezolusaun pasifiku ho demanda wain, inklui ida mak husu ba governu kolonial Portugez hodi dezarma UDT.
Hafoin proposta ba negosiasaun husi Fretilin rejeita no abandona husi administrasaun kolonial Portugez ne’ebe halai hela ba rai-ketan Atauro, Fretilin hare’e katak, sei labele ‘dada-is tan’, hanesan Frantz Fanon bele dehan. Iha loron 14 Agostu iha Aileu, Nicolau Lobato, lider Fretilin dehan “solusaun violentu sei bele posivel” hafoin hare’e asaun-laek husi manu-talin rejime kolonial hodi hakotu violensia.[1]
Hodi kontinua, Fretilin deklara ‘Insuresaun Jeral Armada’ iha 15 Agostu 1975. La to’o fulan ida, Fretilin manan ona ‘funu sivil revolusionariu’ ne’e. Husi ne’e, UDT ho nia aliadu-sira hakiduk no evakua ba Atambua, Timor Oeste, no iha Indonezia nia kontrolu, sira planu hodi mai hadau hikas poder iha Timor, inklui atu inkorpora Timor ba iha Indonezia, bazeia ba interese maioria APODETI. Desde Outubru 1975, kampaña destabilizasaun husi forsa Indonezia hahu iha area fronteira nian. Ikus mai, sira mai ho soldadu Indonezia rihun-ba-rihun, roo-funu, aviaun-funu no parakedista hodi lansa invazaun eskala boot ba Timor iha 7 Dezembru 1975 — husi invazaun ne’e mak inagura tinan 24 ba sofrimentu, jenosida, masakre, no teror husi apparatus politiku-militar Indonezia nian.
Hirak ne’e hatudu, FRETILIN antes Agostu 1975 ne’e, adopta metodu luta legal, elektoral no akompaña ho mobilizasaun-konsientizasaun masal sosial ne’ebe ativu — opsaun luta armada seidauk iha. FRETILIN hatene, no lee situasaun, iha situasaun ne’ebe mak luta politiku-legal, no ne’ebe mak luta politiku-armada.
Fretilin, hafoin Insureisaun Armada inventa ona eventu mean bo’ot ne’ebe loke posibilidade foun — eventu politiku ne’ebe kari hela tempu no espasu foun, no lori buat lahare’e ba iha rai-leten — lori sai povu Maubere husi raikidun ba iha mundu leten.
Husi posibilidade foun nee, kultura foun restaura hikas no reinforsa liu tan — kultura ba egalitariu, emansipatoriu, no masa popular neebe ativu organiza koletivamente sira-an ba objetivu komum. Hirak husi ne’e mak hahoris Falintil, no Organizasaun Popular Feto Timor (OPMT). Falintil nudar liman kroat povu Maubere oprimidu no organizasaun Feto OPMT lidera husi Roza Muki mean nudar produtu husi eventu mean Agostu 1975.
Maske nune’e, barak mak trata funu klase ne’e nudar eventu prematur — istoriografia dominante fo bensa eventu ne’e nudar jogu paternalistiku lokal nian, katak ‘funu maun-alin’. Instituisaun ba memorializasaun sira mo hare’e funu sivil hafoin insureisaun ne’e iha plataforma etikal husi liberal nian katak, entre vitima no autor ba krimi duke hare’e ne’e nudar kontradisaun lolos entre klase rua ne’ebe labele rekonsilia.
Ema balun sei kontinua kestiona ne’e — no ita hakarak hatan ba preokupasaun boot rua husi kritika liberal ne’e: ida mak natureza konflitu no kestaun ba violensia.
Iha jeral, bazeia ba pozisaun ideolojiku husi kontradisaun klase iha estrutura estadu kolonial nia laran, UDT nudar partidu ba klase aas, Timoroan privilejiu no borjuis-kiik neebe halo aliansa ho liurai-sira. Sira nia golpe, nudar klase reaksionariu nia funu hasoru klase opremidu no kiik sira. Durante funu sivil, povu kiik ne’ebe mobiliza husi UDT mak sai vitima barak, duke ema-boot iha UDT.
Hafoin golpe no funu sivil, autoridade Portugez fo ‘asaun-laek’, no ne’e los duni katak, insureisaun husi Fretilin no funu sivil revolusionariu ne’e tulun hodi hakotu moru no inserteza iha prosesu dekolonizasaun — initiativa politika ne’ebe organiza paradoksiku/taka-an, no iha ikus abandona ho oin lafoti husi estadu kolonial Portuges.
Tan ne’e, sem insureisaun armada 15 Agostu, no korajem ho determinasaun boot husi Fretilin lidera husi Nicolau Lobato ba nesesidade hodi kontra-violensia, maka destinu istoria sei ba dalan repetisaun seluk — katak, Timor-Leste sei sai lalais estadu neokolonial no estadu-kliente ba Indonezia no estadu imperialista desde kedas 1975.
Tan ne’e, so Lininista lolos hanesan Nicolau Lobato mak bele desidi kona-ba nesesidade ba luta armada nudar forma luta revolusionariu aas liu hodi hadau poder no ba libertasaun nasional. So ho desizaun revolusionariu lolos, no tuir tempu mak bele muda situasaun hotu no destinu istoriku.
Tan nee, insureisaun armada no violensia revolusionariu inagura posiblidade foun ba lialos politika subjetivu ne’ebe rohan-laek. Maibe UDT-lidera golpe anti-komunista nudar violensia neebe rezulta deit hodi restaura ordem tuan neebe lahuk ona — no intervensaun husi Fretilin halo interupsaun tiha ba hakiduk ne’e — intervensaun ba iha repetisaun ba tempu. Tan ne’e, golpe no violensia reaksionariu husi UDT ne’e, nudar asaun ne’ebe la muda buat ida, no kontra-violensia husi Fretilin konsege prevene expansaun husi violensia hasoru povu Maubere.
Hafoin sira ne’e hotu, saida mak ita hamenon mak lian emblematiku ba lialos iha deklarasaun insuresaun jeral armada ne’e — iha neeba temi dehan, hodi ‘konkista Independensia Nasional, no libertasaun total no kompleta husi povu Maubere’. Ne’e rasik afirma katak, Fretilin laos deit simplesmente luta ba independensia nasional, maibe ‘revolusaun Povu nian ne’ebe orienta ba eradika forma hotu husi dominasaun no exploitasaun husi ema ba ema’.[2]
Tan nee, insureisaun no funu sivil nudar eventu, tan levantamentu popular no jeneralizada ne’ebe lori buat-laharee ba moris — iha neebe, iha asaun masa organizadu no revolta popular — tanba fiar ba poder masa popular no uza forsa nudar luta revolusionariu. Barak mos tenta redus ne’e ba historia revolta militar, ho perspetiva puru militar nian. Ida ne’e, hatudu, koletivizasaun husi masa popular no Timoroan iha forsa kolonial, hamutuk iha diresaun koletivu Fretilin nian mak halo revolta autentiku ne’e susesu.
Nee nudar eventu tan iha ideia egalitarian husi deklarasaun ne’ebe preskrebe katak ita tenki luta hodi halakon forma hotu husi dominasaun no exploitasaun, no tenki luta ba ideal komum ne’e. Neeba eventu tan, multiplisidade infinitu ba lialos, fiel ba lialos. Ho kualidade nune’e mak, Agostu mean valida-an nudar politika radikal no real ba emansipasaun.
Rekupera Esperansa no Reinventa Politika Emansipatoriu
Eventu mean loke sekuensia politika iha Timor nia luta ba libertasaun nasional. Ita tenki vizita-hikas eventu sosio-politiku ne’e bebeik no bebeik — hanesan Lenin hatuur dehan, ‘to begin from beginning over and over again’.[3] Ita nia vizita-hikas ba ‘hahu’ mak atu oinsa tenki rekupera hikas esperansa politika iha pasadu sira nee, no reinventa sira nia ‘korajem’ hodi bele sobu dilematiku husi tempu disorientadu — iha hakdasak agora nian iha Timor nee.
Ita tenki foti insureisaun ne’e hodi lansa hikas, karik konservativu oitoan maibe inovativu liu duke ho saida mak Franco ‘Bifo’ Berardi, autonomista Marxista Italianu bolu ‘insureisaun permanente’ hanesan dalan uniku atu ita bele dada-iis hikas no rezisti hasoru kapitalista schizophrenia no fetisismu demokratiku — laos politika halai-sees (escapism) maibe hodi halo negasaun. So deit ho insureisaun, ita bele hakuur liu kontradisaun trajiku sira neebe halo ita sai impontente/kbiit-laek no niilista. Insureisaun permanente laos, katak ita naive no kultu ba violensia ba tempu agora, maibe tenki anota katak, so inventa no kria politika emansipatoriu foun ida ne’ebe orientadu hodi kontra-violensia ne’e nesesariu, e laiha tan via kompromisiu ka konsensus koruptu.
Tan ne’e, ita tenki reinventa politika emansipatoriu hanesan saida mak Fretilin halo ona iha Agostu 1975, atu nune’e ita bele hakuur liu ba laloran Fukuyamista neebe halo ita nian funu-nain ba libertasaun, inklui ativista demokratiku iha jeral rende total no kbiit-laek tebes hodi simu deit ona forma ukun liberal demokratiku no konsensus bem-star kapitalismu nudar orizonte ikus liu husi politika pratikal ne’ebe lulik tebes hafoin independensia.
Nafatin, eradika forma hotu ba dominasaun no exploitasaun nudar mehi dahuluk no aas ne’ebe la tau ba meza hodi tetu tan — no absensia ba politika real hanesan iha Fretilin nia tinan mean iha 1975, halo demanda emblematiku ne’e hanesan tiha fali irasional, no mehi-mamuk iha Timor ida agora. Se laiha nafatin vizaun no asaun alternativu hanesan iha Agostu mean ne’e, krizi, impase no hakiduk nudar reinvensaun permanente husi ita nia moris politika neebe organiza husi reprezentasaun falsu partidu politika no poder Kapital.
Tinan tolu impase politika (2017–2020 no kontinua) iha Timor hatudu dunik absensia ba politika revolusionariu lolos. Fretilin, ho nia lideransa, presiza iha alternansia politika, inspira husi Fretilin ida iha Agostu Mean 1975. Demokrasia no nasionalismu deit mos la to’o atu fo alternativu ba ‘violensia objetivu’ husi kapitalista neoliberalismu — hafoin seidauk iha alternativu ruma maka lafasil mos sai husi nakukun ne’e. Impase iha Timor refleta mos impase planetariu iha ordem kapitalista neoliberal, no absensia ba politika singularidade lolos neebe mak sei halo opozisaun lolos ba modelu estadu demokratiku reprezentativu ne’ebe hahi ordem kapitalismu neoliberal.
Ita hotu haree katak, bainhira krizi mosu iha estadu fasista no totalitarian hanesan uluk iha Portugal 1974, no Indonezia 1999, ita hotu hatene katak demokrasia mak nia resposta — tendensia mak oinsa tenki restaura demokrasia — maibe agora ita moris ona iha estadu demokratiku, no demokrasia ne’e rasik nudar mate-isin ne’ebe lao lemorai daudaun ba nia prosesu dizolusaun. Impase marka ona pontu final ba demokrasia iha Timor, no dalan ida deit neebe atu hakuur liu mak tenki reinventa politika emansipatoriu radikal ne’ebe foun — se lae, hela deit naran — ita se hakat fila ba kotuk hodi restaura fasismu, populista liman-los no tirania husi konservativu nasionalista ne’ebe hanoin klot no admirador ba kapitalismu — daudaun ne’e ita hare’e tendensia aat nee.
Ikus liu, orizonte mean husi Agostu 1975 hanorin mai ita kona-ba singularizasaun ba luta no politika. Nudar konservativu neebe defende autentisidade husi sira nia dimensaun evental, maka ita tenki ativu hodi involve, liu husi reinvensaun ba esparansa no politika emansipatoriu foun — ita tenki, hamoris hikas konsiensia Maubere. Figura revolusaun iha 1975 mak Maubere — tan ne’e, ita haree oinsa Insureisaun Maubere liu husi Fretilin iha Agostu 1975 nudar partidu ba klase — tan ne’e, oras ita nian mak, Resureisaun Maubere.
‘rebirth of History/Historia moris-hikas’, proklama husi ita nia filozofu bo’ot Alain Badiou ne’ebe sei moris ho ita, maka tenki sai mos ‘rebirth of Idea/Ideia moris-hikas’[4] — ita mos ho haksolok anunsia katak, Maubere moris-hikas ona nudar Ideia, no naran ba ema komum, organizasaun politika-sira no sujeitu revolusionariu ne’ebe luta ba konfronta forma komum hotu husi dominasaun no exploitasaun hotu — tubarai ba sosiedade ida justu, solidariu no egalitarian. Maubere, hanesan hori-uluk ba, nafatin sai figura militante, klase opremidu no povu ne’ebe ‘fanatikamente buka, liberdade autentiku’.[5]
[1] Pires, M. L. (1981). Relatório do Governo de Timor: Periodo de 13 de Novembro de 1974 a 7 de Dezembro 1975. Lisboa: Presidência do Conselho de Ministros.
[2] Comite Geral, Texto da Proclamação da Insurreição Geral Armada, Jornal do Povo Mau Bere, Nu. I, September 27, 1975.
[3] Lenin, V. I. (1965). Collected Works. Moscow: Progress Publishers.
[4] Badiou, A. (2012). The Rebirth of History. London and New York: Verso.
[5] DOPI (1977), Os Movimentos de Libertação Nacional, o Imperialismo e os Grupos Fantoches. Timor-Leste: Fretilin.
